शिरूर,पुणे : (प्रा.सुभाष शेटे,कार्यकारी संपादक) – शिरूर तालुक्यातील शिव,पाणंद,शेत रस्ते खुले करण्यासाठी तात्काळ कार्यवाही करा अशी मागणी महाराष्ट्र राज्य शिव पाणंद शेत रस्ता चळवळीचे प्रणेते शरद पवळे यांनी केली आहे. याबाबत नुकतेच शिरूर तहसीलदारांना निवेदन देण्यात आल्याचे पवळे यांनी सांगितले. तर या चळवळीस शेतकरी,नागरिकांच्या सहभागातून राज्यात अधिक गतिमान करणार असून शेवटच्या शेतकऱ्याला शेतीला दर्जेदार रस्ता मिळाल्याशिवाय ही चळवळ सुरूच राहील असा इशारा पवळे यांनी सा.समाजशील शी बोलताना दिला आहे.
शिरूर तालुक्यातील विविध गावच्या शेतकऱ्यांनी महाराष्ट्र राज्य शिवपाणंद शेतरस्ता संदर्भातील अडचणींचा पाढाच वाचला. कृती समितीच्या समोर शासन दरबारी शेत रस्त्यांचे मरगळत पडलेले प्रश्न व त्या विषयी लेल्या वर्षानुवर्षाच्या प्रशासकीय पातळीवरील संघर्षांच्या व्यथा अनेक शेतकऱयांनी मांडल्या. या महत्वपूर्ण प्रश्नी शेतकऱ्यांच्या पाठीशी समिती भक्कमपणे उभी राहणार असून विविध मांगण्यांचे निवेदन शिरूर तहसिलदारांसह,गटविकासअधिकारी व शासन दरबारी देण्यात आले आहे. याची योग्य ती दखल घेऊन तात्काळ कार्यवाही न केल्यास तीव्र स्वरूपाचे आंदोलन करून प्रशासनाला जाब विचारण्याचा इशारा पवळे यांनी दिला आहे.
नुकत्याच शिरूर येथील शासकीय विश्रामगृहावर शिव पानंद शेतरस्ता समितीच्या वतीने मार्गदर्शन मेळावा बैठकीत तालुक्यातील विविध गावच्या शेतकऱ्यांनी उपस्थित राहून शेतरस्त्यासंदर्भातील आपल्या समस्या मांडल्या. विविध प्रश्नांच्या चर्चासत्र नंतर सर्वानुमते शिरूर शिव पानंद शेतरस्ता कृती स्थापन करत तहसील कार्यालयातील प्रलंबित शेतरस्ता केसेस तातडीने निकाली काढा,शासन निर्णयाची अंमलबजावणी करावी तालुका शेतरस्ता समितीच्या वतीने तालुक्यातील सर्व ग्रामपंचायतींना ग्राम शेतरस्ता समितीच्या तातडीने आदेश देण्यात यावेत, तालुक्यातील सर्व वहिवाटीच्या रस्त्यांचे सर्वेक्षण करून त्याच्या नोंदी गाव नकाशावर घेण्यात याव्यात,शासन निर्णयाप्रमाणे मोजणी शुल्क व पोलीस संरक्षण फी बंदची अंमलबजावणी तातडीने करण्यात यावी,शिव पाणंद शेत रस्त्याचे सर्वेक्षण करून नंबरी हटवणार यांना दंड सुरू करा,तहसील कार्यालयामध्ये येणाऱ्या प्रत्येक अर्जाला उत्तर देणे बंधनकारक करा,शिव पाणंद शेत रस्त्याची हद्द निश्चित करून समृद्ध गावासाठी दर्जेदार शेतरस्ते तयार करावेत,शेती रस्त्याअभावी पडीक राहणाऱ्या शेत जमीन धारकांना विना अट नुकसान भरपाई देण्यात यावी अशा विविध मागण्यांचे निवेदन शिरूर तहसीलदारांसह गटविकास अधिकाऱ्यांना देण्यात आले .
यावेळी महाराष्ट्र राज्य शिव पाणंद शेत रस्ते चळवळीचे शरद पवळे यांसह रवींद्र सानप,रवींद्र धनक,ॲड. सुप्रिया साकोरे ,शांताराम पानमंद,निलेश गायकवाड,सुनिता चव्हाण,संजय कुशेकर,नितीन थोरात,संतोष लंघे,या सह अनेक मान्यवर व शेतकरी उपस्थित होते.
या प्रश्नासंदर्भात शिरूर तहसीलदार बाळासाहेब म्हस्के यांच्याशी संपर्क साधण्याचा प्रयत्न केला असता तो होऊ शकला नाही. परंतु तहसील कार्यालयातून मिळालेल्या मिळालेल्या खात्रीलायक माहिती नुसार या संदर्भात लवकरच तालुक्यातील शेतकऱ्यांसोबत बैठकीचे आयोजन करण्यात येणार असून यात महसूल विभाग,पोलीस यंत्रणा ,गटविकास अधिकारी,संबंधित अधिकारी,कर्मचारी, महाराष्ट्र राज्य शिव पाणंद शेत रस्ता चळवळीचे प्रणेते शरद पवळे व समितीतील समन्वयक व सदस्यांसह शेतकऱ्यांना निमंत्रित करण्यात येणार असून यातून विविध शेत रस्त्यांचे प्रश्न मार्गी लावण्यासाठी योग्य ती कार्यवाही करण्यात येणार असल्याची माहिती मिळाली. त्यामुळे शिरूर तालुक्यातील शिव पाणंद शेत रस्ते खुले होण्यास मदत मिळणार असल्याने शेतकऱ्यांमधून समाधान व्यक्त होत आहे.