शिरूर,पुणे : (देवकीनंदन शेटे,संपादक) – शिरूरच्या पश्चिमेकडील अनेक गावात उसाचे मोठे क्षेत्र असून सध्या विविध कारखान्यांची कवठे येमाई सह बेट भागात ऊस तोडणी सुरु आहे. ऊस तोडणी कामगार थंडीची पर्वा न करता भल्या पहाटेच ऊस तोडण्यासाठी संबंधित शेतकऱ्याच्या उसाच्या शेतात दाखल होऊन ऊस तोडणीचे काम करीत आहेत. या भागातून गेलेला डिंबा उजवा कालवा,त्याच्या पोटाचाऱ्या व घोडनदीतून मिळणारे पाणी यामुळे बहुतांश शेतकरी हमखास उत्पन्न देणारे पीक म्हणून ऊस शेतीकडे वळाले आहेत. परंतु हा बागायती भाग जणू बिबट्या प्रवण ग्रस्त भाग झाल्यासारखा असून उसात लपण्यासाठी मोठीच जागा बिबटयांना मिळत असून पाटाच्या पाण्यातू न किंवा इतर ठिकाणांहून आलेले घोणस सारखे अतिविषारी सर्प देखील उसाच्या फडात आढळून येत आहेत. त्या करीता ऊसतोड कामगारांनी तोडणी करताना अत्यंत दक्षता घेणे गरजेचे असल्याचे प्रतिपादन जेष्ठ पत्रकार तथा युवा क्रांती पोलीस मित्र,माहिती अधिकार,ग्राहक व पत्रकार संरक्षण संघटनेचे महाराष्ट्र प्रदेश मुख्य प्रसिद्धी प्रमुख,मार्गदर्शक व सामाजशील न्यूज नेटवर्कचे कार्यकारी संपादक प्रा.सुभाष शेटे यांनी केले आहे. ते आज सकाळी शिरूर तालुक्यातील ढगेमाथा येथे सुरु असलेल्या शेटे यांच्या शेतात ऊस तोडणी कामगारांशी बातचीत करताना बोलत होते.
उसाच्या शेतात बिबटे,कोल्हे,लांडगे यांना लपण्यासाठी जागा उपलब्ध होत असल्याने या वन्य प्राण्यांचे शेतकऱ्यांना अनेकदा दर्शन होत असते.कोल्हे,लांडगे शक्यतो त्रासदायक ठरत नसले तरी बिबट्याची मात्र दहशत ऊस तुटेपर्यंत त्या त्या भागात कायम च असते.त्यातच भर म्हणजे घोणस सारख्या अति विषारी सापांचे प्रमाण ही या भागात वाढलेलं असल्याबाबत शेतकऱ्यातून चर्चा ऐकावयास मिळत आहेत.मध्यंतरी याच परिसरात एका विषारी सापाच्या दंशा मुळे एका शेतकरी महिलेचा मृत्यू देखील झाल्याची घटना घडली असल्याने शेतामध्ये काम करताना शेतकरी,ऊस तोड कामगारांनी अत्यंत दक्षता घेण्याचे आवाहन प्रा.शेटे यांनी केले आहे.
