शिरूर,पुणे : (देवकीनंदन शेटे,मुख्य संपादक) – शिरूर तालुक्यात यावर्षीच्या मार्च महिन्यांपासूनच उन्हाळाच्या तीव्र झळा बसत असून सातत्याने हवा बंद होत असल्याने उष्म्याचे प्रमाण ही वाढले आहे. मानवाबरोबर जंगलातील पशु पक्षी व प्राण्यांचे पाण्याअभावी अतोनात हाल होताना दिसत आहेत. जंगलातील पशु व प्राणी पाण्यासाठी भटकंती करू लागले असून प्रसंगी आपला जीव धोक्यात घालून जंगली प्राणी खोल विहिरीत पाणी पिण्यासाठी उतरताना विहिरीत अडकत असल्याने त्यांचा जीव धोक्यात येत आहे.या प्रकारच्या काही घटना या भागात घडलेल्या आहेत. या सर्वांचा एकंदरीत विचार करून शिरूर वन विभागाने प्राणी, पशु व पक्षांसाठी शिरूर वनक्षेत्रात ठिकठिकाणी तयार करण्यात पाणवठ्यावर टँकरद्वारे पाणीपुरवठा करण्याचा स्तुत्य उपक्रम सुरु केला असल्याची माहिती वनकर्मचारी हनुमंत कारकूड यांनी सा.समाजशील शी बोलताना दिली.
शिरूर तालुक्यात वनखात्याची अनेक ठिकाणी वनक्षेत्र आहेत व सध्या उन्हाचे तापमान वाढल्याने वन्य प्राण्यांची पाण्यासाठी होणारी भटकंती थांबवण्यासाठी वनविभागाच्या वतीने नियमित टँकरद्वारे पाणीपुरवठा करण्यात येत आहे जेणेकरून जंगली प्राण्यांना पाण्याची कमतरता भासू नये.तालुक्यातील चिंचोली मोराची परिसरात मोठ्या प्रमाणात वनक्षेत्र असून या ठिकाणी अनेक प्रकारचे वन्य प्राणी व पक्षांचा अधिवास आहे यामध्ये मोर, कोल्हा, लांडगे, तरस,ससे, तसेच विविध जातीचे पक्षी आढळून येतात. यामध्ये राष्ट्रीय पक्षी मोरांची संख्या अधिक आहे.अनेक पर्यटक या ठिकाणी मोर पाहण्यासाठी भेट देत असतात आता एप्रिल सुरु असून उन्हाळ्याची तीव्रता वाढु लागली असल्याने या भागात असणारे ओढे,नाले, पाणवठे जवळपास आटले आहेत त्यामुळे पाण्याच्या शोधासाठी वन्य प्राण्यांची भटकंती वाढत आहे पाण्याचा शोध घेत फिरताना अनेकदा त्यांना मानवाबरोबरच संघर्ष करावा लागत आहे तसेच आपल्या जीवासही मुकावे लागत आहे यातून निर्माण होणारा संघर्ष टाळण्यासाठी वनपरीक्षेत्र अधिकारी प्रताप जगताप यांच्या मार्गदर्शनाखाली वनपाल गणेश पवार, वनरक्षक नारायण राठोड व वनमजूर हनुमंत कारकुड हे वन क्षेत्रात तसेच लगतच्या भागात वनविभागाने तयार केलेल्या पाणवठ्यात काही दिवसांच्या अंतराने वीस हजार लिटरच्या टॅंकरने पाणी सोडण्याचे काम करत आहेत. ते पाणवठे काठोकाठ भरण्यात येत आहेत उन्हाची तीव्रता जास्त असल्याने हे पानवठे अटणार नाहीत याची दक्षता वन विभागाकडून घेतली जात आहे.
वन्यप्रेमींनी या वन्य पशू पक्षांसाठी अन्न व पाण्याची आपापल्या परीने मदत करुन या वन्य प्राण्यांचा जीव वाचविण्यासाठी खारीचा वाटा उचलावा असेच आवाहन शिरूर वन विभागाकडून करण्यात आले आहे.
