संत निरंकारी मिशनद्वारा शिक्रापूर येथे विशाल रक्तदान शिबिर

समाजशील न्यूज नेटवर्क : शिक्रापूर, ता.शिरूर (-प्रतिनिधी, राजाराम गायकवाड) : संत निरंकारी सत्संग भवन, शिक्रापूर पुणे झोन, येथे संत निरंकारी मिशनची सामाजिक शाखा, संत निरंकारी चेरिटेबल फाउंडेशनद्वारा विशाल रक्तदान शिबिराचे आयोजन रविवार, २० जुलै २०२५ रोजी करण्यात आले होते. ज्यामध्ये मिशनचे अनुयायी आणि आजूबाजूच्या परिसरातील नागरिकांनी उत्स्फूर्तपणे सहभाग घेऊन १४५ युनिट रक्त संकलन करण्यात आले. यशवंतराव चव्हाण रुग्णालय रक्तपेढी यांनी  रक्त संकलन करण्याचे कार्य केले. या शिबिराचे उदघाटन ताराचंद कारचंदानी यांच्या शुभहस्ते संपन्न झाले. या वेळी संत निरंकारी मंडळाचे इतर पदाधिकारी तसेच सामाजिक क्षेत्रातील मान्यवर मोठ्या संख्येने उपस्थित राहून मिशनच्या कार्याचे कौतुक केले. संत निरंकारी मिशनद्वारे बाबा हरदेव सिंहजी महाराज यांनी मानवतेला संदेश दिला कि ‘रक्त नाल्यांमध्ये नाही, नाड्यांमध्ये वाहिले पाहिजे’. संत निरंकारी मिशनच्या अनुयायांनी हा संदेश निश्चितपणे अमलात आणला असून आज वर्तमान काळात सद्गुरु माता सुदीक्षाजी महाराज यांच्या निर्देशानुसार निरंतर पुढे नेला जात आहे. संत निरंकारी मिशन द्वारा शिक्रापूर परिसरामध्ये मानवतेच्या कल्याणार्थ वेळो-वेळी अनेक जनसेवेचे उपक्रम आयोजीत करण्यात येतात, ज्यामध्ये मुख्यतः स्वच्छता अभियान, वृक्षारोपण, निशुल्क आरोग्य तपासणी ,नेत्र चिकित्सा शिबीर तसेच महिला सशक्तीकरण, बाल-विकास, नैसर्गिक संकटांच्या वेळी सहायता  यांसारख्या कल्याणकारी योजनांचे आयोजन केले जाते. यासारख्या सर्व सामाजिक कार्यासाठी  भारत सरकार तसेच राज्य सरकारांद्वारे मिशनला वेळोवेळी सन्मानित करण्यात आले आहे. रक्तदान शिबिराच्या यशस्वीतेसाठी संत निरंकारी सेवादल, मिशन चे अनुयायी यांचे विशेष योगदान लाभले. दरम्यान रक्तदान जागृती जनसामान्यांमध्ये व्हावी यासाठी शिक्रापूर परिसरात  घरोघरी जाऊन  रक्तदानाचा संदेश पोहोचवण्यात आला.आलेल्या सर्व रक्तदात्यांचे व मान्यवरांचे आभार जयराम सावंत यांनी व्यक्त केले.यावेळी जिल्हा परिषद सदस्य कुसुमताई मांढरे शिक्रापूरचे विद्यमान सरपंच रमेश गडदे तसेच करंदी पिंपळे जगताप. शरद वाडी येथील नागरिक उपस्थित होते.