अष्टविनायक महामार्गावर इचकेवाडी, बंटी धाब्याजवळ तात्काळ गतिरोधक बसवा : शिरूर पंचायत समिती सदस्या कांचनताई सांडभोर यांची मागणी

समाजशील न्यूज नेटवर्क,शिरूर,पुणे : (देवकीनंदन शेटे,संपादक) ; शिरूरच्या पश्चिमेकडील कवठे येमाई इचकेवाडी परिसरातुन जाणाऱ्या गतिमान वाहातून असलेल्या अष्टविनायक महामार्गावर बंटी धाब्याजवळ व त्याच परिसरात इतर ही ठिकाणी वारंवार होणाऱ्या अपघातांच्या पार्श्वभूमीवर तात्काळ झिक झाक गतिरोधक (स्पीड ब्रेकर) बसविण्याची मागणी शिरूर पंचायत समिती सदस्या कांचनताई राजेश सांडभोर यांनी सा.समाजशील शी बोलताना केली आहे.
या महामार्गावरून  वाहनांची मोठ्या प्रमाणावर वर्दळ असते. धाबा, स्थानिक दुकाने आणि गावाकडे,वस्ती वाडीकडे वळणारे अनेक रस्ते यामुळे पादचारी, शालेय विद्यार्थी,शेतकरी,दुग्धव्यवसायिक तसेच नागरिकांना रस्ता ओलांडताना अनेकदा मोठा धोका निर्माण होतो. याच अष्टविनायक महामार्गावर कवठे येमाई गावठाण,इचकेवाडी,खार ओढा,काळूबाई नगर,बंटी ढाब्या नजीक अनेकदा किरकोळ तसेच गंभीर स्वरूपाचे अपघात घडले असून नागरिकांना शारीरिक व आर्थिक नुकसान सहन करावे लागले आहे.तर अनेकांना अपघातात  जीव देखील गमवावे लागले आहेत. कांचनताई सांडभोर यांनी संबंधित सार्वजनिक बांधकाम विभाग व प्रशासनास या परिसरात महामार्गावर तात्काळ गतिरोधक, सूचना फलक आणि वेगमर्यादा दर्शविणारे बोर्ड लावण्याची मागणी केली आहे. तसेच रात्रीच्या वेळी पुरेशी प्रकाशयोजना करण्याची गरजही त्यांनी व्यक्त केली.
स्थानिक नागरिकांनीही या मागणीला पाठिंबा दर्शवून प्रशासनाने त्वरित कारवाई करावी, अन्यथा या प्रश्नी तीव्र आंदोलन छेडण्याचा इशारा दिला आहे.