समाजशील न्यूज नेटवर्क,शिरूर,पुणे : (प्रा.सुभाष अण्णा शेटे,कार्यकारी संपादक) – शिरूर तालुक्यातील जिल्हा परिषद प्राथमिक शाळा, फाकटे येथील विद्यार्थ्यांनी इयत्ता पाचवी शिष्यवृत्ती परीक्षेत उल्लेखनीय यश संपादन करत जिल्हा गुणवत्ता यादीत आपले स्थान मिळविले आहे. नुकतीच जाहीर झालेल्या गुणवत्ता यादीत शाळेच्या तब्बल पाच विद्यार्थ्यांनी चमकदार कामगिरी केली असून, गावासह संपूर्ण बेट भागातून त्यांच्यावर अभिनंदनाचा वर्षाव होत आहे.
गुणवत्ता यादीत मच्छिंद्र चाटे (२५६ गुण), रामप्रकाश वाळुंज (२५६ गुण), ईश्वरी बाबाजी शिंदे (२४४ गुण), आयुष नागेश केदारी (२३८ गुण) आणि शिवप्रसाद विकास भालेकर (२३६ गुण) यांनी यश मिळविले आहे. विशेष म्हणजे आयुष नागेश केदारी याची प्रतिष्ठेच्या जवाहर नवोदय विद्यालयासाठीही निवड झाली आहे.
या सर्व विद्यार्थ्यांना श्री बाबाजी पोपट हिलाळ सर यांचे मोलाचे मार्गदर्शन लाभले. विद्यार्थ्यांच्या या उज्ज्वल यशाबद्दल शिरूर पंचायत समितीचे गटविकास अधिकारी महेश डोके,तालुका गटशिक्षण अधिकारी डॉ. प्रितम कोकणे,शाळेच्या मुख्याध्यापिका प्रिया काळे, केंद्रप्रमुख गणेश काळे तसेच शिक्षणप्रेमी ग्रामस्थ यांनी विद्यार्थ्यांचे, पालकांचे व शिक्षकांचे अभिनंदन करून पुढील वाटचालीस शुभेच्छा दिल्या आहेत.फाकटे शाळेच्या या यशामुळे परिसरात आनंदाचे वातावरण निर्माण झाले असून, गुणवत्तापूर्ण शिक्षणाच्या दिशेने शाळेने आणखी एक मानाचा टप्पा गाठल्याची भावना ग्रामस्थांनी व्यक्त केली आहे.
