कवठे यमाई येथे कर्करोग तपासणी शिबिर; १३२ रुग्णांची तपासणी – मोबाईल व्हॅनमधून स्त्रीरोग व दंतरोग तज्ज्ञांकडून तपासणी; प्राथमिक आरोग्य केंद्रातील अधिकारी-कर्मचाऱ्यां चे सहकार्य

समाजशील न्यूज नेटवर्क,शिरूर,पुणे  : (प्रा.सुभाष शेटे,कार्यकारी संपादक) – शिरूर तालुक्यातील कवठे येमाई प्राथमिक आरोग्य केंद्र येथे कर्करोग तपासणी शिबिराचे आज दि. १३ ला आयोजन करण्यात आले. या शिबिरासाठी आलेल्या मोबाईल व्हॅनमध्ये स्त्रीरोग तज्ज्ञ डॉ. दिनकर सरोदे आणि दंतरोग तज्ज्ञ डॉ. सचिन पवार यांनी एकूण १३२ रुग्णांची तपासणी केली.शिबिरात महिलांची स्त्रीरोगविषयक तपासणी तसेच नागरिकांची दात व तोंडाच्या आरोग्याशी संबंधित तपासणी करण्यात आली. कर्करोगाची प्राथमिक लक्षणे, त्यापासून बचावाच्या उपाययोजना, नियमित तपासणीचे महत्त्व आणि आवश्यक उपचार याबाबत रुग्णांना मार्गदर्शन करण्यात आले.
मोबाईल व्हॅनच्या माध्यमातून नागरिकांना त्यांच्या परिसरातच तज्ज्ञ वैद्यकीय सेवा उपलब्ध झाल्याने रुग्णांनी शिबिराला उत्स्फूर्त प्रतिसाद दिला. तपासणीदरम्यान संशयित लक्षणे आढळलेल्या रुग्णांना पुढील तपासणी व उपचारांसाठी आवश्यक सल्ला देण्यात आला.या शिबिराच्या यशस्वी आयोजनासाठी प्राथमिक आरोग्य केंद्र, कवठे यमाई येथील अधिकारी व कर्मचारी यांनी सहकार्य केले. रुग्णांची नोंदणी, तपासणीची व्यवस्था, मार्गदर्शन आणि शिबिरातील इतर कामकाजात आरोग्य कर्मचाऱ्यांनी महत्त्वाची भूमिका बजावली.

कर्करोगाचे लवकर निदान झाल्यास उपचार अधिक प्रभावीपणे करता येतात. त्यामुळे नागरिकांनी नियमित आरोग्य तपासणी करून घ्यावी आणि कोणतीही संशयास्पद लक्षणे आढळल्यास तातडीने डॉक्टरांचा सल्ला घ्यावा, असे आवाहन वैद्यकीय तज्ज्ञांनी केले.

असंसर्गजन्य रोग  कार्यक्रमांतर्गत डॉ. दिनकर सरोदे  सर स्त्री रोग तज्ञ डॉ. सचिन पवार सर दंत रोग तज्ञ यांनी प्राथमिक आरोग्य केंद्र कवठे यमाई येथे कर्करोग तपासणी शिबिरासाठी आलेल्या मोबाईल व्हॅन मध्ये एकूण 132 रुग्णांची तपासणी केली. वरील कॅम्प साठी प्राथमिक आरोग्य कवठे यमाई येथील अधिकारी व कर्मचारी यांचे सहकारी सहकार्य लाभले.